Yi Jia

Þetta er nafnið á sænska stórveldinu Ikea í Alþýðulýðveldinu Kína. Ég er nú búin að sækja Ikea heim í tvö skipti. Fyrst á laugardaginn síðasta þar sem ég varð að troðast áfram í þéttu mannhafinu. Það virtust allir hafa mikinn áhuga á að prufa alla hlutina sem eru til sölu, t.d. hvernig mortelið virkar, og þá var bara barið í það endalaust mér til mikillar skemmtunar eða hittó. Ég brunaði áfram með kerruna mína í gegnum verslunarsvæðið og greip það sem ég ætlaði að kaupa og umhugsunartíminn var að meðaltali 1 sekúnda. Ég náði samt að versla mikið af helstu nauðsynjunum fyrir heimilið á methraða og dreif mig út eins fljótt og ég gat. Aðeins of mikið af fólki fyrir Íslendinginn í mér.

Ég skellti mér svo aftur í dag, það var mun rólegri stemming og ég gat keypt allt sem ég gleymdi að kaupa í fyrri ferðinni. Það verður að segjast að það er ansi heimilislegt að versla í Ikea og ég keypti nú ýmislegt í sama stílnum og var heima á Skólavörðustígnum. Svo var ekki verra að enda verslunarferðina á að fá sér eina pylsu í brauði með sinnepi og tómat :-)

Athugasemdir

[mooney (IP-tala skráð) 6.9.2007 kl. 10:18]

Að fara í Ikea um helgar er bara ávísun á vandræði.  Ég slysaðist til að kíkja sl sunnudag, ekki nóg að það væri helgi..nei það voru sko mánaðarmót.  Þetta var eins og að vera stödd í stórverslun í Póllandi, eina fólkið sem talaði íslensku var starfsfólkið í yfirfullri barnagæslunni!