Skemmtisaga úr hversdagsleikanum

Ég sit þessar stundirnar við ritgerðarskrif eins og áður hefur komið fram. Við slíkar aðstæður geta hinar minnstu sögur úr hversdagsleikanum glatt geðið og það var ein slík sem hressti andann í dag og um leið stemminguna við skriftirnar. Hann faðir minn var staddur í verslun í dag við Suðurlandsbraut þegar maður vindur sér að honum ansi aumingjalegur og biður hann um aðstoð. Pabbi þekkti að þarna var kominn einn frægasti íbúi Laugardalsins sem býr með spússu sinni í tjaldi á tjaldstæðinu og hefur verið í fréttum hér annað slagið. Karlinn vildi endilega fá smá aðstoð frá pabba en það var nefnilega þannig að gasið var búið á tjaldheimilinu og var kuldaboli farinn að gera sig ansi heimakominn. En það sem pabbi held ég að hafa fallið fyrst og fremst fyrir var að frúin á heimilinu var orðin ansi slæm af asma út af kuldanum. Nú pabbi tekur karlinn bara með sér og saman fara þeir að versla gas fyrir heimilið. Pabbi skildi karlinn eftir í bílnum á meðan hann fór inn í verslunina og greiddi fyrir gasið. Þetta fannst mér hinni harðsvíruðu dóttur hans náttúrulega algjört glapræði enda kannast ég við kauða frá störfum mínum fyrir lögguna og ef mig minnir rétt var það í öllum fréttum á sínum tíma að þegar þau hjúin fóru í brúðkaupsferð til Egilsstaða áttu þau eh erfitt með að hafa hemil á sér og urðu ýmsir verslunarmenn þar í bæ fyrir barðinu á þeim. En ekki virðist þetta hafa komið að sök og pabbi saknar einskins eftir þennan gasleiðangur og skilaði hann tjaldbúanum heim í tjaldið þar sem hann getur yljað sér og sinni frú aftur á ný.

Athugasemdir

[Kristbjörg Þórisdóttir, 13.1.2008 kl. 23:36]

Hefur þú verið í lögreglunni Kolbrún???  Ja hérna hér! Mikið er ég ánægð með þig kona!!!

[Kóngurinn (IP-tala skráð) 16.1.2008 kl. 13:57]

Er ekki betra að mamma þín fari yfir bílinn þar sem væntalega er engin flatskjár í bílnum