Land lita og ilms-Grein birt í ferðablaði Fréttablaðsins 1. júní 2008

Einhvern veginn virðast litirnir vera skærari í Víetnam, ilmurinn meiri og orkan áþreifanlegri en við eigum að venjast. Þetta fallega og spennandi land sem maður þekkti áður mest af sögum og bíómyndum af stríðinu sem háð var milli Norður-Víetnams (kommúnista) annars vegar og Suður-Víetnams (lýðræðissinna) og Bandaríkjanna hins vegar. Í dag er Víetnam á hraðri leið með að breytast úr lokuðu kommúnistaríki í þjóð þar sem efnahagurinn blómstrar og allt er á uppleið þótt stjórnarfarið hafi ekki breyst svo mikið. Í Víetnam búa 84 milljónir manna. Víetnamar eru glaðlyndir og stoltir enda hafa þeir þurft að verja sitt í gegnum tíðina og í þeirri baráttu hafa þeir sigrast á stórþjóðum eins og Kínverjum og Bandaríkjamönnum. Það er eins gott að vera vakandi í umferðinni í Víetnam, mannmergðin er mikil, stærsti hluti fólksins í borgunum ferðast um á mótorhjólum eða vespum, jafnvel heilu fjölskyldurnar á einu hjóli. Hraðinn er mikill þar sem allir þeysast áfram og nota flautuna óspart. Það er eftirtektarvert að flestir í umferðinni eru með andlitsgrímur til að verjast menguninni sem óneitanlega fylgir svona mikilli umferð. Konurnar hafa greinilega gert þetta að tískufyrirbæri því grímurnar er hægt að fá í öllum litum með mismunandi mynstri og ekki var óalgengt að sjá konur með þær í stíl við klæðnað dagsins. Flestir Víetnamar eru búddatrúar og eru því stór og smá bænarskríni úti um allt, hvort sem er á heimilum, hótelum eða verslunum. Í skrínin er lagður matur og blóm og kveikt er á ilmandi reykelsi fyrir látin ættmenni og því ilmar allt dásamlega.

 

Ódýrt og þægilegt

 

Auðvelt er að ferðast um Víetnam þar sem flugsamgöngur eru góðar. Flugfélagið Vietnam Airlines er til fyrirmyndar og svo er einnig mjög ódýrt að ferðast með rútum en hægt er að taka næturrútur, sem er mjög þægilegt. Í flestum borgum og bæjum er auðvelt að skella sér upp í svokallaðan "Tuk tuk" en það eru kerrur annað hvort aftan á hjólum eða mótorhjólum og fá sér góða skoðunarferð, kíkja í búðir eða skella sér í nudd.

Fyrir ferðamenn frá Íslandi er afar hagstætt að ferðast um Víetnam, hvort sem um er að ræða gistingu, samgöngur, mat eða skemmtanir. Allt þetta kostar aðeins brot af því sem venjan er heima. Það er líka hagkvæmt að kaupa víetnamskar vörur en vestrænar vörur eru ekki jafn hagstæðar. Mikið úrval er af vörum úr silki svo sem fötum eða heimilisbúnaði, en einnig er að finna ýmsa hluti skorna út í tré og listaverk eftir víetnamska listamenn. Þá eru ónefndir hlutir sem eru einkennandi fyrir Víetnam eins og lampar í mörgum litum og hattarnir sem margir Víetnamar virðast nota dagsdaglega en ekki aðeins á hrísgrjónaökrunum.

 

Veisla fyrir bragðlaukana

 

Matargerð Víetnama er fáguð og fersk. Það fer auðvitað mikið fyrir alls kyns réttum úr núðlum og hrísgrjónum og fiskur er einnig mikið notaður. Ávextirnir og grænmetið er hreint dásamlegt og manni finnst að þau séu stútfull af vítamínum og hollustu. Úrvalið af nýkreistum ávaxtasöfum og ávaxta- og grænmetissalötum er næstum óendanlegt. Úr hollustunni í dásamlegar syndir því það er urmullinn allur af bakaríum og kaffihúsum sem selja nýbökuð brauð og ótrúlega fallegar kökur af öllum stærðum og gerðum. Bragðgæðin eru mikil enda greinilega bakað eftir frönskum uppskriftum þar sem smjörið er í hávegum haft. Kaffi er einnig í miklum metum en Víetnamar drekka kaffið sitt vel sterkt, eru með trekt fyrir hvert glas og bæta svo út í bleksterkt kaffið sykri og niðursoðinni mjólk. Í öllum þeim borgum og bæjum sem ég heimsótti var mikið úrval af veitingastöðum og kaffihúsum sem buðu upp á mjög góðan mat. Hægt er að velja á milli staða sem bjóða upp á mat heimamanna eða frá mismunandi heimshornum. Vert er einnig að veita athygli veitingastöðum og kaffihúsum sem rekin eru með það að markmiði að veita krökkum sem bjuggu áður á götunni atvinnu. Góð leið til að styrkja gott málefni. Ekki er hægt að tala um mat í Víetnam nema að minnast á alla réttina sem fást á götum úti. Það er mjög ódýr og góður matur og fer þjóðarrétturinn núðlusúpan Pho þar fremst í flokki.

Athugasemdir

[Hólmdís Hjartardóttir, 2.6.2008 kl. 16:36]

og Halong Bay er ofurfallegt

[Erna (IP-tala skráð) 4.6.2008 kl. 00:12]

Hæ Kolla mín. Flott grein hjá þér. Það er svolítið síðan ég fór inn á síðuna þína. Gaman að lesa um allt hjá þér. Ekki hægt að ímynda sér allt sem þú ert að upplifa og sjá þarna.